أنا راجع لحضنك
فمتخافيش
لساني بحبك
واللي بينا اكبر م الملح و العيش
اللي بينا عمر مرسوم بجدايل شعرك
ف عز خوفك و ألمك و قهرك
عمري ما اوفيكي
حتى يوم من سهرك
فمتقلقيش
لما الشتا تشتي
وأحس بالبرد ف جسمي
اخدك ف حضني
تطبطبي و تسمي
أنا محتاجلك اكمني
بدونك ما اقدر أعيش
راجعلك لجل ما ارتاح على حجرك
وتلمسي شعري وتتغني ب شعري
حبي منقوش ف صدرك
يمكن لاني قدرك
ونص عمرك
وعذابك ويا سهرك
وعني ما تستغنيش
قبلك ما كان ليا كيان
حبك زلزال و بركان
راحة وسكن وحصن أمان
وما عرف طريق الخيانة
لأن حبك رساله و أمانة
وكل الستات جمبك
يا حبيبتي ما تساويش
دخلت الدار والفرح عم الارجاء
شمس ونهار ف الصبح و المساء
إنتي أغلى من نانسي و هيفاء
إنتي إللي عليتي البناء
تزيحي الهم والشقا والعناء
وتسقيني أحلا كوباية شاي
والشهد من بين سنانك
عسل و سكر سنترافيش
الف والف وارجع ليكي
وانا صغير ولما اكبر بكبر بيكي
تبقي معايا وف ثانية توحشني عنيكي
ربنا يطول عمرك يا حبيبتي ويخليكي
ولاخر العمر راجعلك
فماتندميش
راجع لحضنك.
عبدالله رجب أبو عدنان
More Stories
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب
قدر .. بقلم ولاء شهاب