بقلم أحمد محمود شرقاوي
ده كان بوست على صفحة روحانيات على الفيس بوك، دخلت أدور على الطلسم لقيته في التعليقات، كتبته على ورقة بتسلسل الحروف بتاعته وبدأت اقرأ، أنا كنت فاكرة إن انا لوحدي، لأني في الأوضة ومقفول عليا الباب، مكنتش أعرف إن فيه كارثة بتشوف من خلال عنيا إسمها القرين..
الشيطان بيجري في ابن آدم مجرى الدم، معلومة احنا كمسلمين عارفينها من أحاديث الرسول اللي طلب مننا نتحصن بالأذكار صباحا ومساء، لدرجة انك بتستعيذ من الشيطان صراحة في كام ذكر، مطلوب منك تنفض فراشك قبل نومك وتنام على جمبك اليمين..
كل ده عشان رسولنا الكريم عارف إن الشيطان لو اتملك منك هيعمل فيك ايه، بس احنا بنحب نتجاهل كلام الرسول الكريم أو نعمل اننا مش واخدين بالنا وخلاص بقينا في عصر العلم، وقدر الشيطان يلاقي ألف ثغرة عشان يدخل بيها حياتك ويسود عيشتك، لدرجة انك بتظن أوقات انك نحس، محسود، رزقك قليل، بس في الحقيقة الشيطان هو اللي اتملك منك..
أنا بقا الشيطان تملكني بطريقة مختلفة خالص، أنا كنت ساذجة، وقررت أدخل في سكة أنا معرفش عنها حاجة، بس القانون لا يحمي المغفلين، وانا تابعت جروبات الرعب من بدري أوي وكنت مدمنة لأي كاتب بيكتب قصص رعب، وبالأخص الكاتب اللي اسمه أحمد محمود شرقاوي، وده لأنه تقريبا بينزل كل يوم قصة رعب، يعني بقا إدمان، وصفحته سهل أوي توصلها لو بحثت بإسمه ثلاثي على بحث الفيس..
بصراحة كنت بعاني من الكوابيس كل فترة، بس مجرد أحلام مجرد ما بصحا بنساها تماما، لحد ما صادفت وشوفت كومنت بيعلن عن جروب روحانيات، وبلمسة على الموبايل دخلت الجروب..
وفوجئت بكوارث، طلسم لرد المطلقة، طلسم لجلب الحبيب، طلسم لزيادة الرزق، وكل بوست كاتب كمية تفاصيل تثبت ان دي علوم ربنا نزلها على حضارات قديمة وإذا هي مش حرام، وإن الطلاسم دي ما هي إلا طاقات بتبعد عنك الطاقة السلبية عشان تزود رزقك وهكذا..
كلامه كان فيه حتة إقناع بصراحة، وملقتش غير الكاتب أحمد محمود شرقاوي، بعتله ع الخاص وخدت رأيه، وكل اللي رد بيه جملة واحدة “أمور شركية تجلب الهلاك فابتعدي عنها”
بصراحة كنت بتمنى يكتب كلام محايد عشان فضولي كان سايقني، بس هو قطع عليا الطريق، وفضلت في الجروب فترة طويلة لحد ما خدت أول صدمة عاطفية في حياتي، حب أربع سنين ضاع في شات واحد، وشوفت وش قاسي من شهاب اللي كنت بعشقه عشق، إهانة وتجريح وصلت لدرجة إنه قال صراحة إنه شايفني مجرد جسم مثير وبس..
ماهو الحرام هيجيب حرام وذل، بس انا مكنتش قوية عشان استوعب رسالة ربنا، وانهرت على فراق شهاب، ووسط صدمتي لمحت البوست ده، طلسم جلب الحبيب أو رد حبيب قديم، والعجيب إني في الوقت ده بس كنت ببكي على مواقف كتير افتكرتها..
وبدون وعي دخلت على البوست، أول كومنت كان الطلسم، وكان مكتوب بحروف متفرقة، والمطلوب منك تنقله على ورقة وتمشي على تسلسل ٥٦٢٧٤٦٧
يعني تاخد أول ٥ حروف كدا كلمة، بعد كدا تاني ٦ حروف كدا كلمة، وهكذا تجمع كل الحروف ككلمات بالعدد الرقمي اللي فوق ده، وتبدأ تردد الجملة وفي النهاية تقول إسم اللي عايز تجلبه واسم امه..
طبعا انا استحالة كنت اقرأ الطلسم، انا جمعته وبصيت عليه بعنيا بس، “الطلسم” شهاب ابن نجلاء..
بعدها على طول قولت في نفسي ايه التخلف اللي انا بعمله ده وروحت قافلة النت خالص، وفضلت زي مانا بكمل بكاء على كل موقف وكل ذكرى، والغريب إني زدت في البكاء بطريقة عجيبة، كأن فيه فيضان جوة عنيا من الدموع مش عايز يقف، وبدون إرادة مني بدأ صوت بكائي يزيد ويعلى اكتر واكتر، ووسط بكائي ده فوجئت بحاجة بتحسس على جسمي، وبالأخص فوق كتفي..
كانت عاملة زي كف الإيد الخشن، جسمي كله اتكهرب ووقفت مكاني وانا خايفة، في اللحظة دي حسيت بحرارة في ضهري، كأن فيه حد واقف ورايا، وبدأت توصلني ذبذبات غريبة، كأن فيه موجات غريبة في المكان..
جسمي قشعر وحسيت بتنميل مسكني من ضهري ورجلي، كأن جسمك عايز ينهار في الأرض، مقدرتش استحمل الرعب ده كله، وجريت لبرة الاوضة، قعدت شوية في الصالة بحاول اتمالك أعصابي وبعد شوية رجعت اوضتي عشان انام من تاني، وبالفعل نمت عادي جدا..
وفي نومي شوفت نفسي متسلسلة بألف سلسلة من حديد، وكأن شياطين الجاثوم كلها واقفة على جسمي، ايديا ورجليا متخشبين على وضعية مخيفة، شفايفي مقفولة زي المشلولة بالظبط، وجسمي ثقيل بدرجة رهيبة..
ورغم إني نايمة شوفت إيد سودة عاملة زي الهيكل العظمي بتحسس على جسمي كله من أوله لأخره، كنت بتنفض في صمت، عايزة اصرخ مش قادرة، عايزة اتحرك مفيش، حتى اني انطق اسم ربنا كان استحالة..
وبدأت الإيد تخربش في جسمي، وتتحسس جبهتي بالقوة، كانت إيد باردة زي لوح الثلج، كنت بتنفض وجسمي كله بيتكهرب بهيستريا، بس مكنتش حتى بهمس، وفضلت على الوضع ده دقايق طويلة، لدرجة إن دموعي نزلت مني..
دموع الخوف والرعب، كنت بصرخ جوايا وانادي ربنا، وفي لحظة لمحته، شخص ضخم وشه أزرق وعنده قرنين صغيرين، وعنيه كانت زرقا بلون وشه، مناخيره مكنتش موجودة، وسنانه كانت خارجة منه بطريقة مرعبة..
قرب خطوة ورا خطوة ناحية سريري وحسيت بيه بيلمس في جسمي كله، كانت ريحته بشعة وايده عاملة زي السكين، فضلت اتحشرج واطلب من ربنا أموت، كنت في حالة فزع مُطلق، وفجأة اتفتح باب الأوضة ودخلت أمي، واتنفضت من سريري وصحيت..
وبدون وعي اترميت في حضنها وفضلت اترعش وابكي بشدة، حضنتني جامد وحاولت تفهم انا فيا ايه بس مكنتش قادرة أنطق حتى، وبعد ساعة كاملة يادوب قدرت أبرر واقول إني شوفت كابوس..
بس لما دخلت الحمام وشوفت جسمي المليان علامات سودة كأنها حروق عرفت إنها مش كوابيس خالص، وبالأخص لما، لما
لما قطع نور الحمام، وانا واقفة قدام المرايا متخشبة، ونفس اللي حصل من شوية حصل تاني، بس وانا صاحية، وواقفة قدام مراية الحمام، جسمي كله اتشل مرة واحدة، بقيت بشهق بصوت عالي كأني في سكرات الموت، وحسيت بنفس الإيد الباردة، الخشنة بتخربش في جسمي كله، وبدأ صوت أنفاس حد تيجي من ورايا وحسيت بسخونة جسمه، وقتها مقدرتش أتحرك أكتر من كدا ووقعت من طولي في الحمام، وكل اللي حسيت بيه ضربة عنيفة في راسي..
فقت من نومي عشان أحس بصداع رهيب، ولقيت راسي مربوطة بشاش وقطن، وكانت أمي جمبي بتبكي، وعرفت منها إني وقعت في الحمام ودماغي خبطت في البانيو واتعورت، ولولا ستر ربنا وانها جت بسرعة كان جرالي حاجة..
شوية ولقيت ابويا جاي ومعاه راجل وقور كدا، ابتسم في وشي وقالي:
– أخبارك ايه يا ست البنات
ابتسمت في وشه وقولت بخجل:
– الحمد لله
– أنا عمك عبدالله صاحب بابا
– أهلا وسهلا
– ممكن تحكيلي بقا اللي حصل
بصيت لأمي بتعجب وفهمت، فهمت إني لما وقعت في الحمام عريانة وامي دخلت شافت جسمي المتخربش خرابيش سودة، مع صراخي وبكائي قبلها وترجمت كل ده، واتصلت بوالدي اللي جاب شيخ وجه..
وحاولت أحكي بس كنت متوترة أوي في حتة شهاب، حتى إني قولت اني قرأت الطلسم بعنيا وخلاص كتجربة مش أكتر..
ابتسم الشيخ وقرب مني وبدأ يتلو قرآن بصوت عذب جدا، حسيت وقتها بصداع بسيط وجسمي كان بيسخن شوية ويهدى شوية، في النهاية ابتسم وقال:
– الحمد لله محاولة مس مش تلبس
– مش فاهمة حاجة يا شيخ
– بصي يا بنتي، ربنا من رحمته بيكي رغم وقوعك في الحمام خلى الشيطان ميعرفش يتلبسك وده نادرا ما بيحصل، والشيطان ده دخلك من خلال ثغرة عملها قرينك
-يعني ايه
– يعني الجروبات دي كلها بتاعت ناس نصابين ودجالين وسحرة، وبيحطوا طلاسم سحر حقيقية عشان يضروا الناس، وانتي افتكرتي ان قراءتك بعنيكي مش هتضرك، بس القرين كان بيردد من جواكي بلسانه هو، وبالتالي القرين بيحضر اخوانه من الجن لما يقرأ الطلسم ودي بتبقا الثغرة اللي بتحصل في جسمك
بصتله بخوف وقولت:
– يعني…
– ايوة يا بنتي أي طلسم بيبقا مضر، حتى لو كان مش كامل، والقرين بيردد الطلسم حتى لو صاحبه مقلش ومن هنا بيفتح سكة للشيطان عشان يدخل حياة الشخص ده ويحولها لجحيم
– انا خايفة اوي
– متخافيش يا بنتي الحمد لله محصلش تلبس لسة، وانا رقيتك وهديكي ورد قرآني تمشي عليه والأذكار وبكدا مفيش حاجة هتقرب منك
وقتها حسيت بالقهر، بالخوف من ربنا، ربنا اللي عصيته بشهاب وفي نفس الوقت كان رحيم بيا ومخلاش تحصلي حالة تلبس، وندمت اكتر لأني بصيت على الطلسم، ويمكن انا شوفت وقت صعب جدا بس اتعلمت، اتعلمت إن الطلاسم دي كلها أمور شرك ومينفعش حتى أشوفها بعنيا، وإني طول مانا قريبة من ربنا هيحميني من كل حاجة، وبعت كل التفاصيل للكاتب واعتذرت إني مسمعتش كلامه من البداية..
More Stories
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب
قدر .. بقلم ولاء شهاب