مُهرة ومهرها غالي
والجبين لفوق عالي
والجمال ملوش أوصاف
يتحاكا بيه والكل يخاف
علىٰ قلبه من خطوتها
والكبرياء هو شيمتها
تسحر قلوب بـ طلتها
مُهرة
ياغاليه ياللي تفاصيلك
غناها الناس في مواويلك
عنيدة
والشعر مفتول علىٰ خصرك
يا مُهرة والأصيل أصلك
والعز فـ نظرتك واصلك
وسهام الحظ جَت عكسك
ياللي أحبابك صابوكي
بـ السهم الأول راموكي
ولما رمحتي لـ خيالك
بـ إيدهُ مسح علىٰ كتافك
لكن سهمه قوام صابك
وكان الغدر في طريقك
والخذلان أهو رفيقك
سهام الجرح صابوكي
ولا اداروا وشافوكي
ونزيف الروح أشد كتير
ولو عدينا كام مره
اصابك سهم يا حره
هنلاقي م الجروح اكوام
مُهرة
وعجز عن وصلك كل الخيالين
والشموخ فـ كل همسك
وعِزك فوق الجبين
مُهرة وخطوتك ثابته
وسط الخيول
ورماح الظلم اتصوبت
وسط الضلوع
ولا تنحني ولا تنزلي
ولا بـ اللجام تتثبتي
حتى وإن صابوا العيون
More Stories
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب
قدر .. بقلم ولاء شهاب