الدنيا رايحة مش مستاهلة
دي الحياة بالحب أحلي
إرضى بالمقسوم وسلم
تلقي مُر الصعب يحلي
عيشها زي ماهي عِيش
لو معاك او لو مفيش
لفرحها خليك حرامي
ولحزنها إقلب شاويش
إغلب الغدار بضحكة
ياما قبله راح وولي
دي الحياه بالحب أحلي
الحياه صفحات كتابك
فيها فرحك واكتئابك
كل صفحة بتحكي قصة
وكل قصة مكتوبة لك
وإن رضيت بسيناريو فيلمك
يبقي يوم السعد جالك
وإن حزنت في يوم عليها
يبقي غاوى تعيش عذابك
والشيطان بيك يتسلي
دي الحياة بالحب أحلي
حب صاحبك وإرضي عيبه
أنت مش خالي العيوب
وإن زعلك بلاش تسيبه
وبلاش تجرح في القلوب
ده اللي يعذر أو يسامح
غالب وعمره ما كان مغلوب
والعمر وقت بسيط ورحلة
والحياه بالحب أحلي
More Stories
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب
قدر .. بقلم ولاء شهاب