التضحية .. بقلم هبة أحمد

من أصعب الجمل اللي ممكن تسمعيها في حياتك: ،،محدش طلب منك تضحي،، بتلاقي كل حروف الجملة عبارة عن سهام بتتوجه ليكي .. بتكوني عاملة زي اللي وقف في نص السلم لا قادر ينزل ولا قادر يطلع عشان يكمل…

الغريبه بس أن محدش شايف أنك اللي بتعمليه تضحية ولا ذياده عن أي حد ..غيرك أنتي .. يعني لما تتنازلي عن راحة نفسك وروحك داه قرارك واللي حواليكي أتعودوا عليه .. وقت ما تكرري تعلني تعبك أو عدم قدره تحملك متنتظريش أن حد يتقبل داه بالشكر والتقدير وتذكر التضحيات..

هيكون صعب تقبل فكرة أنك في سن الأربعين وولادك وجوزك شايفينك في مكان تاني بيجروا وراكي في المستشفيات.. دينك ما قالش تحرمي نفسك من وجبه جسمك محتاجها علشان غيرك يكون مستكفي وفائض عنه ..دينك ما قالش تحرمي نفسك من لبس ومظهر كويس عشان ولادك وجوزك يكون أفضل حد في الدنيا وأنهم مرايتك …هييجي وقت في عمرهم هتلاقي شكلك ومظهرك يهمهم بس ممكن وقتها يكون فات الأوان ..

ساعتها المثالية والتفاني المبالغ فيه ..من وجهة نظرك أنتي هتتحول لأتهام ..أن محدش طلب منك غير العادي وأنتي اللي أخترتي يبقي مفيش جواكي غير أوهام ضعيت حقوق وخلقت عقوق وصنعت أتهام.