مالك ياامي عنيكي حزينة ودامعة
إنتي تملي نجمه ساطعة
ياولدي أنا بطلب الموت في كل ساعة
ياامي استني حبتين
أبويا مات وخالي و عمي
ومفاضلش غيرك ياامي
وشوفي بقالي قد اية وأنا حزين
ياواد سايبني وحدي وقافلة عليا الباب
لا حد خبط من الأحباب و لا حتى من الأغراب
حتى قبر أبوك بقا كوم تراب
ومن كتر البكا عنيا راحو الاتنين
كل ما اشوف الناس حوليا بتموت
أحس أني خلاص قربت وهاموت
ياامي ما تزوديش حزن على حزني
مين غيرك يعول همي
والدنيا جاية عليا ياامي
وظالماني من سنين
واللة كبرت ياواد قبل الأوان
فاكر لما كنت ما تنامشي غير ف حجري زمان
ولا نساك جريك ورا النسوان
ياواد أنا كنت بداري دموعي على خدي
ومفيش حد حبك في الكون دا قدي
وجاي تبكي و تترجاني
شوف مين ها يعوضك حناني
المرادي مش ها تسافر زي كل مره
وتقول راجع بعد جمعتين
افديكي بقلبي وروحي
بس تفضلي معايا وما تروحي
ما قولتلك قبل سابق ما تسيبنيش
أنا عايشة بيك وليك بعيش
ياواد أجمد و ما تبكيش
إنت إبني وحتة مني
وقلبي راضي عليك ليوم الدين
يامة شوية وجع ويخفو
يابني أنا مش احسن من اللي اتخطفو
شباب و بنوت
هوا كده الموت
ما بيفرق و لا بيميز
ولا إنت عايزني لما أكبر واعجز
واتسند على عكازين
ياامي استني حبتين
أبويا مات وخالي و عمي
ومفاضلش غيرك يا أمي
وشوفي بقالي قد اية وأنا حزين
ربنا يطول ف عمرك ياامي سنين وسنين
More Stories
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب
قدر .. بقلم ولاء شهاب