الشاعر عمر أحمد عبد العزيز
بتهيصوا ليه وبتنفخوا البلالين
هو انتو فاكريني تميت تلاتة وعشرين
لا انا ماتمتش تلاتة وعشرين
انا تميت خمسين أو ستين
واللي قالولكم غير كدة كدابين
أو ناس مش فاهمين ولا واعيين
مهو العمر مش بيتقاس بالسنين
العمر بيتقاس بالتعب وبالأنين
صحيح انا ماتعبتش زي المطحونين والشقيانين
بس فكري عجزني من سنين وسنين
انا شخص مدمن لشيء أسمه تفكير
انا شخص جوة مخه حكاوي كتير
بفكر في اللي ممكن واللي مش ممكن
بفكر لدرجة تجعل الحر أسير
بس بالرغم من قسوة تفكيري بحبه
مهو الواحد كدة ساعات بيحب التكدير
التفكير على فكرة في الأصل نعمة
واحنا اللي بنخليه للأسف زي اللعنة
مهو كل حاجة لما بتزيد عن حدها بتأذي
والتفكير الزايد ممكن يخلينا نهزي
يبقى الخلاصة أن التفكير بيعجز
وأن الصغير مش صغير طالما شايل كتير.
More Stories
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب
قدر .. بقلم ولاء شهاب