شريك الحياة.. العيوب بقلم إيمان عزت

.. كنا بنقول إيه العيوب اللي في شريك الحياة وممكن نستحملها ولا لا
.. أنا رأىي إن مفيش إنسان كامل وكلنا فينا عيوب وموضوع إنه عيب أو لأ دي حاجه نسبية من شخص للتاني
.. بس مننكرش إن في عيوب مش ممكن تحملها
.. زي إيه؟
… البخل مثلا.. سواء ماديا أو عاطفيا
.. طب ماديا وفهمناها إيه عاطفيا دي
.. يعني مينفعش وقت كتير يمر بين إتنين بيشاركو بعض الحياة وميقولوش لبعض كلمه حلوة
.. يعني إيه؟ أسيب أكل عيشي وأقعد أقول كلام حلو
.. لأ وكمان أنا أقصد الطرفين مش الراجل بس ويا سيدي الكلمه الطيبه صدقة
.يعني تشكرها على تعبها، وتدعيلك وتطبطب عليك لما تجيبلها حاجة
.. يعني مشاركة معنوية
.. أيوا فيها إيه بعد الأكل لما تقول لها تسلم إيديك، وهي تقولك بالهنا
.. هتقوللي إنتم زنانيين أوي ونكديين
.. لا عندك زنانييين ماشي، بسبب إنكم مبتعملوش مصالح البيت في وقتها ودا بيسبب خساير ، الست لوحدها اللي بتبقا حاسة بيها وعارفاها
.. طب َالنكد؟
.. لا ماهو أنت متروحش تتفسح وتسهر وتهزر مع صحابك وترجع متقولش ولا كلمة أو تزعق وبس وترجع تقول دي نكدية
.. تقوللي.. تنكري إن طلباتكم كتير؟
أقولك عندك عقل يحكم لو حاجات ليها وبس وفوق طاقتك ووصلت لمرحله الأنانية دا يبقا عيب خطير لكن لو طلبات عامة للبيت فدا غصب عنها.
.طب.. ليه البنت بعد الجواز مبتهتمش بنفسها زي قبله؟
.. مش كله بترجع لإهتمام الزوج بدا وعوامل
إقتصادية
.. ماشي طب ليه بعد الجواز ومن قبله كل حاجة تحكيها لمامتها وصاحبتها وكل الناس؟
.. دي ترجع لحاجتين شخصيتها وإتفاقك معاها وإختيارك
بس لازم تعرف إن أنت كمان متروحش تحكي ولا إيه؟
.. طبعا ماهي أسرار بيوت.