أكل العيش بقلم د. أحمد وجيه

أنت ايه اللى يخليك صابر ع الشغلانة دى ؟
نعمل ايه بقى … أكل العيش.
أنت مستحمل المدير ده ازاى ؟
أعمل ايه … أكل العيش.
يااااه بتشتغل عشر ساعات !!!
أعمل ايه أكل العيش.
أنت ليه بتطبل للراجل ده ؟
عاوزين نعيش .. أكل العيش
أنت ليه بتخزوق زمايلك ؟
أتغدى بيهم قبل ما … أكل العيش .
وكم من أسئلة إن طرحناها سيظل الجواب واحداً طوال الوقت … أكل العيش . وكأن هذا العيش كتب علينا الشقاء والمذلة والهوان والخيانة والنفاق ، لماذا دائما نقرن بين أكل العيش وكل ما هو سلبى ؟ لماذا دائما أكل العيش مرتبط بكل ما تم ذكره من أسباب تتفق جميعها مع شىء واحد فقط ألا وهو الخضوع. العمل الذى يكون مبنيا على علاقة الخضوع والعبودية يجعل من الإنسان دائما كائن غير مستقر نفسيا بل يتطور الأمر إلى الدونية وتغليب المصلحة الفردية والبحث عن الطموح الفردى ونسيان خصال حميدة مثل التعاون والمؤازرة وروح الفريق والهدف المشترك وغيره من الصفات التى لطالما قرأنا عنها فى الكتب والآراء الفلسفية للأدباء والمفكرين .
طيب إسأل نفسك وصلنا لكده ليه … من غير فلسفة وكلام مزوق … عشان فقدنا الثقة فى أنفسنا وبالتالى فقدنا الثقة فى قدرتنا. لو كل واحد فينا تمسك بإيمانه بثقته بنفسه لما قال كلمة أكل العيش مطلقا لأننا بالفعل لا نعمل من أجل الأكل فقط ولكننا نعمل من أجل بناء أنفسنا ، من أجل هدف ورسالة فى الحياة تختلف من شخص لآخر ، نعمل من أجل النجاح والوصول لهدف فرديا جماعيا وطنيا قوميا أو إنسانيا . العمل ليس لأكل العيش فالمتسولون يأكلون العيش بل الجاتوه ومن ليتوال كمان ، فقصة أكل العيش دى تضحك بيها على نفسك مش علينا … أنت استسهلت الشغلانة ومش عاوز تتحدى نفسك وتشوف الشغل اللى على مقاسك ووفق قدراتك وإمكانياتك … انت بتنيم نفسك تنويم مغناطيسي لحد ما تصحى وتلاقى نفسك بقالك ٢٠ سنة بتشتغل فى حاجة انت عمرك ماحبتها ومع ناس انت عمرك ما ارتحت معاهم وكانت حجتك طول الوقت أكل العيش ، تقدر تقولى أكل العيش اللى يخليك تشتغل وتضيع سنين من حياتك وذكرياتك وفى الآخر تندم يبقى عيش طعمه ايه ؟؟؟ أقولك انا يبقى عيش شامى او اللى بيقولوا عليه العيش الأبيض (White Bread) وده من أكثر أنواع الخبز إنتشارا في الأسواق. يتمّ صنعه من الدقيق المكرّر وهو دقيق الحبوب التي تمّ تعديلها بشكلٍ كبير، فابتعدت عن تكوينها الطبيعيّ وجرّدت من الحنطة والنخالة. الحنطة غنيّة بالدهون المشبّعة أمّا النخالة فهي تحتوي على الألياف ومغذّيات أخرى مثل الزنك، المغنيسيوم، والفيتامين E. لذلك، يفتقد الخبز الأبيض للقيمة الغذائيّة الموجودة أساساً في القمح، وهو يتحوّل بسرعة إلى سكّر ممّا يجعل معدّل السكّر في الدم مرتفعاً ويدفعكِ بالتالي لتناول كميّات أكبر من الطعام. فهمت حاجة … اه العيش الشامى عيش بناكله واحنا جعانين واخرتها سكر وحرقة دم وعدم وجود قيمة غذائية !!!! فهمت يا أستاذ ياللى مصدعنا بأكل العيش … عاوز اكل العيش يقتل طموحك ويكسر شخصيتك ويدفن مواهبك وقدراتك خليك ورا الكلمة دى مستخبي … سافر أتعلم ادرس طور من نفسك وماتخافش كلنا بناكل اخر الليل بس فيه فرق انك تأكل وانت مبسوط ومرتاح نفسيا وبتحقق ذاتك وأنك تأكل وانت متضرر وحاجة مش على نفسك لازم هييجى اليوم اللى نفسك ماتقبلش الأكل ده … سيبك بقى من أكل العيش وروح صالح نفسك …