“معلش” بقلم أ . د / جرمين سمعان

يعنى أنا عمال أحكيلك من الصبح عشان فى الآخر تقولى معلش

طب عايزنى أعمل إيه يعنى ؟

معرفش !!! شوف أنت ، أومال أنا جاى أحكيلك ليه !

طب تحب أتدخل بينكم و أكلم الناس اللى فيه بينك و بينهم مشكلة ؟

لأ .. مش هينفع ، كده هتبوظ أكتر ..

لازم أنا اللى أحلها معاهم .

طب محتاج فلوس لغاية المشكلة ما تتحل ؟

يا سيدى لأ .. المشكلة مش مشكلة فلوس .

طب أروح لاسرتك أقولهم يبعدوا عنك دلوقتى لأنك مش مستحمل حد ؟

لأ طبعا !! هما لازم يبقوا عارفين اللى جوايا و مستحملينى زى مانا .

طب قولى أساعدك إزاى ؟ أنت عارف إنى اتمنى أعملك أي حاجة !

أنا متأكد من مشاعرك ، كفاية إنك بتسمعنى ومستحمل نرفزتى .

طب .. معلش..

ده مش حوار جديد ، بالعكس ، أكيد عدى علينا كلنا ..

لكن الفكرة فيه أننا أوقات بنستخف بكلمة ، ومدى تأثيرها فى الناس حوالينا ..

معلش .. كلمة بتجبر الخاطر ، بتحضن ، بتطبطب

وتحسسك أن اللى قدامك متعاطف معاك ، فاهم مشاعرك و معاك فى ضيقتك

. كلمة بتدل على مواجدة ، على حنييه . يمكن المشكلة نفسها متحلتش .. لكن الراحة او التهدئة النفسية ، دايما بتكون أول الطريق للحل او عالاقل التفكير فى الحل .

متبخلش بكلمة .. و متقللش من قيمة …

معلش .. فى الحياة ، ربنا يجبر بخاطرك .