أقعد جنبك ياخالة
أحكيلك عن حالتي حالة
=أقعدي جاري ياصبيه
وأحكيها الحالة دِيَه
وليه نظرتك حزينه
وورد الخدود دبلان؟!
وليه عايشه فـ ربيعك
خريف ملان أحزان؟!
: فـ الحب ياخالة
حظي مهوش مقسوم
بعيش العمر هجر
قسىٰ وغربه ولوم
والقسوه والحرمان
نصيبي م الزمان
ومين ياخالة يوم
هرب من المقسوم
= عيني عليكِ ياصبيه
قلبك شايل هموم بـ الكوم
: رضيت والله ياخالة
ولا شكيت للناس همي
رضيت اتحرم منه
وهو اغلىٰ ما عندي
وقلبي هيموت عليه
ومش عارف هيعمل ايه
صابر بيعدي عمره
من غير ما يشوف عينيه
= ومين يصبر يابنتي
ده الصبر غالي وشحيح؟!
ومين ع البُعد يقدر
وكتير بَكُوه مجاريح؟!
: صابره وبقول ياخالة
فـ بُعدي هيعيش سعيد
لو كان فـ قربي هناه
ما كان هجر اكيد
=ومادومتي صابرة مالك
م الهم مابان جمالك
_الغيرة
الغيرة نار ياخالة
شاعله قايده فـ حشايا
وقلبي الوحيد حزين
مقتول وحالته حالة
محتار يلقيها فين
راحة البال ياخالة
ضاعت ويا السنين
وبعدنا وخلصنا
ودوبنا الحنين
وليه الغيرة ماسكه
فـ ضلوعي وفـ الوتين
وليه مش عايزه ترحل
وتسيب قلبي الحزين
وكفايه عليه مراره
حرمان وهم وأنين
محتار يروح لفين
فـ الدنيا وحالته
حالة
= يعين قلبك يابنتي
فـ الحب انا شيبت شيبتي
وياشقاه من عدا عمره
من غير ما يدوق قساه
ويعيش فـ الحب
حالة
More Stories
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب
قدر .. بقلم ولاء شهاب