ومكنتش حابه ده التغيير
كان قلبي حنون
بلون ياسمين
إتغيرت كتير وبـ إيدك
ـــــــ حبيتك ــــــــ
كنت لـ قلبي حلم سنين
أمان ومكان
ونس وحنان
حبيت الضيّ من لونك
وعشت غرامي فـ عيونك
حبيت الكون بـ كل ما فيه
حتىٰ الظالمين ويا الجارحين
وكنت أنت دوايا
حبيتك حب ملهوش زي
وأحتار الحب من حبي
قال معداش ولا شوفناش
زيه مثيل ولا فـ الاساطير
حبيت نغزة قلبي
لما بلمح صورتك
حبيت غيرتي عليك
حتىٰ عنادك ويا ملامحك
ـــــ حبيتك ــــــ
وبقيت إدمان لـ عروقي
ومكنتش حابه أنا
شفايا من أدمانك
حبيت تعبي معاك وقساك
وحتى اللين المتخبي ورا بروازك
حبيت ناسك
اهلك بلدك
حتىٰ مداسك
حبيتك لااا أنا عشقتك
وعشقت منك حتىٰ عذابك
وكان قربك أغلا منايا
ـــــــ وفجأه لقيتني أنا اتغيرت ــــــــ
ومكنتش حابه ده التغيير
وبـ إيدك طفيت شمعتي
نستني نغزة قلبي
نستني صورتك قربك حنانك
وبعدت عني وإدتني ضهرك
وأنا اتغيرت
ومكنتش حابه ده التغيير
حكيت كتير عن خوفي
ومكنش همي غير قربك
استكترت نفسك عليا
واخترت تبعد
وعقبت قلبي علىٰ حبك
مقستنيش مقوتنيش
بس خلتني أخطي
الخطوه اللي محبتهاش
وأدوس فيها
واديت ضهري لأيامنا
وساعات فرحتنا القليله
ومشيت بلا عوده
ــــــ ومتلومنيش ــــــ
مأنا اتغيرت
شمعت قلبي طفيتها إيديك
وهشيل حبك صورتك
صوتك ويا عيونك
مع عتابي ال مسمعتوش
وشوية دموع متشافوش
فـ علبه قطيفه
وهخبيها فـ شالي الحرير
ولما شوقي ليك يقل
هرجع اتفرج عليها
وصورتك تفضل احلا صوره
أنا عشت بيها
وارجع من تاني اشيلها واخبيها
ـــــــــ مأنا اتغيرت ــــــــــ
بس لسه بحب نفسي
ــــــــ وهي بتحبك ـــــــ
More Stories
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب
قدر .. بقلم ولاء شهاب