صفصاف على طول الخط
ولاتعرف أبدا تبقى نخيل
غرقان وانت على الشط
ومكان الريح ماتروح بتميل
صفصاف
ومقضي العمر رحيل
من قلة حيلتك بتطاطي
والحمل تقيل
صفصاف
وهاتفضل كدة على طول
لابتسكت ولا بتقول
ولاتملك غير غصن متبت ف المجهول
لامحصل عاقل ولامجنون
بتوزع ضلك بدراعك
على وسع الكون
وبترجع آخر الليل إيدك فاضية
مش راضية تطبطب على روحك
وتبص لروحك فتخاف
وتقول ازاي مابتطرحشي
ومغمض عينك على دمعك
لكن منشاف
ومسلم نفسك للماية
وشراقي سنينك وعجاف
فاتبسم وأقول صفصاف
عبدالمنعم محمد
More Stories
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب
قدر .. بقلم ولاء شهاب