وأنا معاك إبتدي عمري…
نسيت كل اللي فات منه
وكان إيه فيه
خلاص مش لازم أفتكره
ولا هحكي في يوم عنه
أنا اخترت إني أكون وياك
وهستسلم وأسلم لك كمان أمري…
وأنا معاك…
بحّبي زي طفل رضيع…
بيتعلم ويتألم
وبيقاوم ويستسلم
وبين ايدك في أحضانك
وجوا عينيك أتوه وأضيع …
وأنا معاك…
معاني الكون بتتغير…
وألوان الفضا السبعه
لقيت غيرهم
لون الفرحه عندك لون
ولون اللهفة زي جنون
بتوحشني وأنا وياك
أطير جنبك في أحلامي
وألقاك تاني جوايا
وأذوق القرب من قربك
بطعم الشهد والسكر…
وأنا معاك…
بخاف تبعد …بخاف تعند…
خلاص دنيايا كده وقفت
لا عاد ليا طريق غيرك
ولا لغيرك بشوف ولا أطيق
وجودك يعني أنا موجود
وفي خيالي جاوزنا حدود
أنا بيك بس بتعافي وعليك بسند …
وأنا معاك…
ده وعد أكون تمللي معاك…
لا يوم أبعد ولا أنساك
حافظ عهدك يا أحلي ملاك
ولا لغيرك يكون وِدي
ولا أبيعك ولا لخيرك
أكون ناكراك …
وأنا معاك…
بحس إني كتير شبهك
وقلبي حِته من قبك
أنا منك وليك أنت
لا من قبلك أنا حبيت
وفي الدنيا مفيش عاشق
يكون زيك
ولا للحب معني وطعم
من بعدك
وأنا معاك…
هبتدي عمري
ولو حتي خلص عمري
خلاص يكفيني لو لحظة
تكون هي بداية العمر ونهايته
معاك أنت يا كل العمر ياعمري
أمل أمين
More Stories
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب
قدر .. بقلم ولاء شهاب