ليه ياوطن ليه كل شهر حزن والم
وكل يوم تنزل دموعنا
واما تجازينا بصبرنا
تحرق خدودنا
وهديتك تبقا الكفن
متغطي بيه اشرف جنودنا
ليه ياوطن
يبقا البكا مكتوب علينا
ليه ياوطن
تبقا الوشوش دايما حزينه
والام بتنادي ابنها
عايزاه يفوق ويضمها
وسط الجنازة
رافض يصدق قلبها
فاكراة كابوس
واقفه تكلم نفسها
وكمان بتدعي في سرها
يطلع كابوس
تتمني يخلص حلمها
او حتي يطلع
م التابوت طيف ابنها
عايزاة ثواني
لجل تاخده ف حضنها
كان حد عالي
احلي لحظات عمرها
وف لحظه
رجعت العقارب والسنين
وبنظرة ثابته
وعين بايضها من جليد
بتبص للناس كلها
منظر حزين
تتمني حتي لو ابنها
يرجع جنين
يرجع ويدخل بطنها
يشرب حنين
بدل ما يحرق قلبها
راجع دفين
. قتله اللي اهله جوا وطنه
. من خواته محروسين
قتله اللي موهوم انه فارس
وانه شيخ المسلمين
قتله اللي مخدوع
من فتاوي النصابين
قتله وفاكر
نفسه لو مات وانقتل
ها يكون شهيد
والحل نعدل
مش نكمل ع العبيد.
ونحط حد
لفقرهم اصبح نشيد
.لوحد شبعان منهم
مش لزمه سيد
شيلوا اللجام من بقوهم
فكوا الحديد .
لامش هانقبل
حد تاني ذيهم اوجيل جديد .
لفوا المدارس
واشرحوا كلمه وطن
ابنوا في مصانع
وفروا كل الوظايف والسكن
. والغوا الفساد واقتلوا
كل المفاسد والعفن
فوقوا
لتلقوا كله بكرة بينتقل
عرفوهم
يعني ايه حرمة جسد
او موت شهيد
او ابن كان حلم لولادة
وابوة عليل
او قلب ام من الدموع
اصبح ذليل
ولا انتو بردوا بكبركم عايزين مزيد
More Stories
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب
قدر .. بقلم ولاء شهاب