أول قصيدة بتبتدي بصفعه
فعلا يا قلبي مكنش لينا نصيب
و الخير بيجي أما القلوب ترضي
وحده القدر بيحدد المسافات
نفقد حاجات و نظنها ف إيدنا
ساعات يسيب الفقد جرح غويط
وساعات يكون في الفقد مكسبنا
على كل حال الدنيا ليها عادات
و أسوء عاداتها اللعب بالعلاقات
تاخد مقابل كل فرحه سنين
تاخد مقابل كل بعد حنين
و تشوف جروح بتلم ‘ تفتحها
عارف أنا لو شوفت ضحكه ف يوم
بقفل عليها بجفن كله دموع
و أخاف أقرب منها لافضحها
الجوع فوايده أكتر كتير م الشبع
راح ناخد إيه م الدنيا غير ترحال
و الرحله إيه غير بس صاحب جدع
عارف يا صاحبي الدنيا تشبه إيه ؟
تشبه طاحونه بتطحن الأيام
فيه ناس بتاخد عمرها ف ايدها
و فيه ناس بتاخد عمرها ف شوال
حصر الحريق في الروح كما الأشلاء
بيني و بينك كل شيء بيقل
حتي الميزان أبو كفتين إختل
و بقيت باحسب عمري بالأحزان
جربت أهرب منها داخل كهف
يمكن ف يوم تنبت هناك فرحه
فلقيت كهوف الدنيا شوارعها
و ف كل شارع 300 تعبان
الحاوي ينفخ ناره ف المزامير
و أنا كالأسير بعد إنتهاء الحرب
و مفيش بديل في مقابله أصبح حر
فسبوه لوحده تحت رحمة أسد
لو جاع هياكله و لو شبع أحياه
كل القوافل أسرعت ف السير
إلا اللي فيهم سعيهم بيضر
لا تشربوا ماء الوجوه جهرا
و لا تهتكوا عرض القلوب ف السر
More Stories
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب
قدر .. بقلم ولاء شهاب